16.2.2015

Reykjavík býður heimsins bestu Farfuglaheimili.

Farfuglaheimilið Loft í Bankastræti og Farfuglaheimilið á Vesturgötu hlutu á dögunum viðurkenningu alþjóðasamtaka Farfuglaheimila fyrir að hafa verið valin bestu Farfuglaheimili  í heimi árið 2014. Það eru gestir heimilanna sem bókuðu þjónustu sína gegnum bókunarvél samtakanna sem standa fyrir valinu. Alls eru um 2500 Farfuglaheimili um allan heim bókanleg á bókunarvélinni og því er hér um einstakan  árangur að ræða. Loftið lenti í fyrsta sæti og Vesturgatan fylgdi fast  á eftir.

 

Þetta er í fyrsta sinn sem tvö Farfuglaheimili  frá sama landi komast á topp 3 listann yfir bestu Farfuglaheimili í heimi. Auk þess fengu heimilin viðurkenningar fyrir góðan árangur í einstökum flokkum sem gestir gátu látið skoðun sína í ljós. Þessir  flokkar eru vinsamlegasta Farfuglaheimilið, það þægilegasta  og það umhverfisvænasta. Þá var einnig tilkynnt hvaða þjóð hefði verið valin besta þjóðin. Sjá úrslit í einstökum flokkum hér að neðan.  

 

Á þessu ári eru 20 ár síðan íslensk Farfuglaheimili fóru að vinna eftir sérstöku gæðakerfi og er þessi glæsilegi árangur m.a. afrakstur þess starfs. En vinningsheimilin  hafa þó gengið mun lengra því bæði eru þau Svansvottuð og vinna samkvæmt gæðakerfi alþjóðasamtaka Farfugla.

 

„Við erum ákaflega stolt af þessum árangri. Ferðaþjónustan er í örum vexti hér á landi og Farfuglar eru virkir þátttakendur í þeirri uppbyggingu sem á sér stað í Reykjavík og um allt land. Þessar viðurkenningar  hvetja okkur til dáða að gera enn betur en hingað til“ segir Markús Einarsson, framkvæmdastjóri Farfugla. 

 

 „Verðlaunin eru viðurkenning á að vel hafi tekist upp við hönnun og þjónustu á Farfuglaheimilunum en einnig til handa einstöku starfsfólki, sem bæði gerir mikilar kröfur til sín og nýtur þess að taka á móti öllum gestum af alúð“ segir Sigríður Ólafsdóttir, rekstrarstjóri Farfuglaheimilanna í Reykjavík.  

 

Farfuglaheimili ársins                               Þægilegasta Farfuglaheimilið
1. Farfuglaheimili Loft í Bankastræti   1. Seoul Youth Hostel, Suður Kóreu
2. Farfuglaheimilið á Vesturgötu   2. Kyota - Utno Youth Hostel, Japan
3. HI – Martha´s Vineyard, USA   3. Farfuglaheimilið Loft Bankastræti
     
Vinsamlegasta Farfuglaheimilið   Umhverfisvænasta Farfuglaheimilið 
1. HI - Martha´s Vineyard, USA   1. Hong Kong – Jockey Club, Hong Kong
2. Farfuglaheimilið á Vesturgötu   2. HI – Martha´s Vineyard, USA
3. Farfuglaheimilið Loft í Bankastræti   3. Farfuglaheimilið á Vesturgötu
     
Besta þjóðin    
1. Hong Kong    
2. Tékkland    
3. USA    

 

 

Stoltir starfsmenn Farfugla með viðurkenningarnar

Stoltir starfsmenn Farfugla með viðurkenningarnar. 

 

Frá Farfuglaheimilinu Loft

Frá Farfuglaheimilinu Loft. 

<<Til baka

Share |

Farfuglar ses. | Borgartún 6 | 105 Reykjavík | Sími 575 6700 | Fax 553 0535 | info@hostel.is | Copyright ©www.hostel.is - Allur réttur áskilinn.